الكبيبه على اصولها بمكونات وطريقه ولا اسهل من الشيف ايمن العطار
المكونات
1كيلو برغل ناعم
كيلو الاربع لحم مفروم (ده غير الكميه اللى هحشى بيها الكبيبه ودى حوالى نص كيلو)
2 حبه بصل متوسطه مفرومه
قرنفل - نعناع ناشف - جوزه الطيب
ملح
فلفل اسود
الطريقه
بنضف البرغل كويس اوى وبنقعه لمده ساعه وبصفيه كويس جدا من المايه يعنى تعصريه كويس اوى
بعد كده بضيفه على اللحمه المفرومه وتحطى البهارات اللى قلنا عليها والملح معاهم وبعدين تضيفى البصل المفروم الناعم اوى وبعدين تاخديهم وشين فى الكبه بتاع المطبخ عشان عايز عجينه الكبيبه تكون ناعمه ومتجانسه مع بعضها اوى
بعد كده هتاخدى العجينه دى وتطلعى على الفريزر تحطيها لمده ساعه عشان تشد معاكى وتعرفى تشكليها كويس
فى الوقت ده بقى تكوني جهزتي اللحم الي هتحشي فيه الكبيبه وده عباره عن نص كيلو لحم مفروم وبصله مفرومه مع ملح وفلفل اسود ومعاه شويه نعناع وتشوحى اللحم المفروم مع البصل على النار وتصفيها بعد كده من اى دهون وتسبيها تبرد وتبدأي تقطعي دوائر من عجينة الكبيبه وتكوريها بايدكى كرات صغيره ممكن تدهني ايديكى بشوية زيت او مايه وانتي بتكوريها عشان ماتلزقش فى ايديكى ومش تشقق منك وتعملى فيها حفره بصباعك وتحطي فيها اللحم وتبدأي تلفيها بطريقه دائريه عشان تنقفل مظبوط وتخليها على جنب وتعملى غيرها لحد تخلصي الكميه
دخليها الفريزر الحد ما تتجمد تماما وبعدين لما تجي تقليها لازم يكون الزيت غزير وسخن بس اول ما يسخن الزيت وتحطي الكبيبه هدى النار شويه عشان تستوي من جوه و تقلبيها لحد ما تتحمر
بعدين ارفعيها من الزيت على ورق ناشف وتقدم علطول وهيه سخنه
ممكن الكبيبه تعملى منها كميات كبيره وتخزنيها عندك في الفريزر بالايام ومتقلقيش وتقليها عادي مش بيحصلها حاجه
وبالهنا والشفا ايمن العطار